前日係七一, o的人o係度大遊行, 話要普選喎, 我知咩o黎o架, 我都支持狗仔飼狗, 鍾意食咩都自己話事! 早晨起身, 媽咪話我o地都要游行喎! 於是帶我去石澳. 好驚驚呀, 我咁大個仔都係搭第二次車咋, 仲要咁遠路, 我...我好想番屋企呀＞"＜ 好辛苦, 終於去到o個個叫"石澳後灘"o既地方, 好驚, 又唔知邊度o黎, 唯有跟到媽咪實一實啦! o個度有其他狗狗, 有金毛又有拉布拉多喎, 好大隻呀佢o地, 我唔敢行過去, 我仲記得細個o個時俾隻金毛咬到好傷, 到宜家我諗起個心仲係會怦怦跳呀!

望出o的, 哇! 好大個浴缸呀! 唔通又要沖涼? 點知媽咪話呢o的個o野叫"大海", 唔係用o黎沖涼o個喎. 媽咪仲叫我浸落去o忝, 我老虎下都唔制呀! 好驚驚呀, 橫睇掂睇都係個king size浴缸o黎! 點知媽咪抱起我帶我落去, 我嚇到扯晒蝦呀, 嚇死我啦! 一落到去我唯有拼死咁游上岸, 之後我都唔肯再落去. 媽咪好曳曳呀, 玩埋o的咁危險o既o野, 仲叫我落番水o忝, 我梗係唔制啦, 唯有等佢上水, 點知佢點都唔肯上, 我咪吠佢叫佢上水囉! 激死狗啦, 個浴缸又咸又大, 好危險o架嘛, 媽咪又細粒, 唔見o左咁點算喎...... 媽咪咁大個人都唔識死o架!

保護媽咪保護到我好累, 媽咪見我咁, 就帶我去沖身, 準備番屋企. 雖然我辛苦o的, 不過都辛苦佢啦, 又要餵我飲水水, 又要搵人借水喉俾我沖身, 好在有個阿姐好好人o者, 如果唔係我一定會俾o的咸水醃o左做火腿啦! 結果我o地留o左o係大浴場只係個幾鐘倒, 但係我已經好累累, 媽咪好似仲累過我咁~

之後, 媽咪帶我坐的士, 好舒服, 番到屋企我覺得好開心呀, 終於唔驚驚啦! 遲下真係要睇實媽咪先得, 佢越大越懞! 唉, 真係累死狗啦~